تئللرین

نه حُسن‌لر یاراشدیریب اُو خطّ و خاله تئللرین

منیم عَیار عِشقیمی چَکیر سُواله تئللرین

سالیب‌دی شهرین اَهلینی مقال و قاله تئللرین

»او مه جمالین اوستونه سالیبدی هاله تئللرین

اؤزون ده بیلمه‌دین، قویوب منی نه حاله تئللرین«


او خطّ و خال و چشم و لب، گؤزل دی زینَت ایسته‌مز

خدا وئرَن وجاهته، دلیل و علتّ ایسته‌مز

مشّاطه‌دن گؤزل جمال، اؤلونجه منّت ایسته‌مز

»گؤزه للییین ثبوتینه بیر اؤزگه آیت ایسته‌مز

دَییشمه‌ین حقیقتی چَکَر مِثاله تئللرین»

بیر عؤمر ائتدیم آرزو او زولف و کاکلین گؤروم

تصور ائتمه‌دیم بو حَدده عشق موشکولین گؤروم

غَریق بحر حسرتم، اینانما ساحلین گؤروم

« اومیدی باغلادیم گَلیب او بدَرِ کاملین گؤروم

و لیک گؤردوم، اوخشادیب یئنه هلاله تئللرین»


کؤنول قوشون سراغ ائدن، گَرَکدی دانه گَزدیره

جفا و ناز و غمزه چَکمه‌یه، بهانه گَزدیره

گُریز پا نیگاردن آلا نشانه، گَزدیره

« دانیشمیشام صبا ایله تئلینده شانه گَزدیره

دئدیم کی سایبان اوُلا اؤزونده خاله تئللرین»

گؤزل‌لرین ندََندی قلبی مِهردَن اوزاغلیدیر؟

بو آتشِ جفادَن عاشقین اومیدی داغلیدیر

خوشا اُو زُلف حالینه آداخلییا (2)، دوواغلیدیر (3)

« منیم ده زندگانلیغیم او تارِ زُلفه باغلیدیر

چَکیر اُویان- بو یانه هئی سالیر مَلاله تئللرین»

آییتدی قونشولاریمی شبانه ناله وورماغیم

بئزیکدیریبدی خَلقی بیر بئله یول اوسته دورماغیم

هاچان خلاصه قورتولار بسَاطِ غصّه قورماغیم؟

« بو ساده لیکده دور مگر دیز اوسته هئی سورونماغیم؟

او آن کی دامِ صِیدینی تؤکور جماله تئللرین»

اولوبدو شُهره شَهریده مسیر عشقه آزماغیم

دویونله ننده غصّه، ناخُنیله سینه قازماغیم

من «انزابام »، محال‌دور وفا و عهدی پوزماغیم

« بیر اؤزگه حالدا باشلانیر او حُسنه شعر یازماغیم

او لحظه کی «مِهدی »نی سالیر خیاله تئللرین»

استاد انزاب خُویی

این شعر تضمینی است بر سروده مهدی همت زاده، شاعر جوان ماکویی

بالا