آنا یوردوم گوزل خوی

آی گوزل خوی یتیرن تپراقی اصلان وطنیم ***   آنا یوردوم اولارام من سنه قربان وطنیم

سنون عشقین له داماردا دولانار قان وطنیم ***   گزرم گلشنون ایچره تاپارام جان وطنیم

سولماسن گللرین هیچ اولما پریشان وطنیم

نه یازم شانلی دیارم سنه چوخ واردی سوزوم *** سنه دیوانه دی کونلوم سنه عاشیقدی گوزوم

آتمارام فکریوی باشدان سنه قربان من اوزوم *** سنی پوزقون گوره بولمم اونا هیچ یوخدی دوزوم

اولماسا مهر وطن اولماز هیچ ایمان وطنیم

یاز گلر چول چمنینده نه گوزل گولر آچار *** آب زمزم کیمی جوشقون بولاغیندان سو آخار

یاشیل الوان گینرداغ دوشونه لاله تاخار *** بزنر نازلی گلین لر چمنه نازلی باخار

هر طرفدن باخی سان گولدی گلستان وطنیم

باغلارین باغچالارن بلبل شیدا اوچاقی *** کهلیک ین اویناغی داغن دلی جیران قاچاقی

اتگین قرمزی گل لاله و نسرین اوجاقی *** داغ دره باش باشا چاتمش اوجی یوخدور بوجاقی

خوشدی وصفینده یازام روضه رضوان وطنیم

قار گیدر، داغ گویرر محشر اولار دّره حصار *** گول آچار بلبل اوخور لاله گولر صبح بهار

هوادان شِه نم اَلرْ ژاله یویار گرد و غبار *** داغدا جیران دولانارکن ئوزونه سئوگی تاپار

یایلار داغ داشوا لاله و ریحان وطنیم

سورولر داغدا گزنده قوزولار هی مه له شر *** چشمه باشیندا چوبانلار یغشاندا گوله شر

آخشام اوستی سورولر ایولره بیر بیر بولوشر *** قوزی تاپچاق آناسن اممگه آغزی بَلهَ شر

چوخ تماشالیدی بو منظره باخسان وطنیم

گوز گورنده اَریشر حیرته قالخار هوسین *** آبشار دان توکولن سو سپیلر اَسّه اَسین

نجه زنداندا قالار بولبلون آچسان قفسین *** چرپنب شهپر آچار چاق ایلینده نفسین

چخادار عشق صنم عقلینی باشدان وطنیم

یاز گلنده باخاسان گورملی اورین داغینا *** تا گوز ایشلر سه چیچک دوزموش اوداغ صول صاغینا

یام یاشیل، قرمزی، ساری گول اکیبدور باغینا *** باخ یاشیل کورکونه، سیر ایله قوجالمیش چاغینا

اتگی لاله مکانی، باشی طوفان وطنیم

بهارن ابری دولار گاهی یاغب گاهی آچار *** بارلانار اٌول گوزل اورین دوشونه لاله ساچار

عشوه لی کهلیک آدام گورجه قی گیز لینجه قاچار *** قوجامان باشدا قارا قارتالا باخ شهپر آچار

تازه دن بیرده طبیعت تاپاری جان وطنیم

گورسنور سنده صلابت نه گوزل چلّه خانا *** آرنلرار خانقهین چوخلی صفا روحا ، جانا

ای اولان سیر و سلوک اهلینه مأوای ثنا *** معرفت باده سین ایچ سینه ده عشقین اویانا

خوش قورار بزم صفا بلبل دستان وطنیم

باخی سان باغدی قزل گول حسابی یوخدی سایی *** قرمزی لاله کیمی گولّر آچار نیسان آیی

عطری باشدان آپارار هوش،گولون یوخدی تایی *** گلابن درده دوادور، هابیله سئوگی پایی

سنه باش اگمه لی دور قمصر کاشان وطنیم

تپراقنداندی، سویوندان ؟ نه دور حکمت نه نشان؟*** ایلیوب نازلی باخیش حوری لرین سنده مکان

ئوزی گول، کپریگی اوخ قزلارون قاشی کمان *** شیرازن ترکی گوزلیکده خُویا چاتماز اینان

غارت ایلیورکونولی چاه زنخدان وطنیم

شرح ور باشقا منه آندرانیک جنگینن *** گورسنور سینه ده چوخ کهنه یارا رنگینن

شیشه عمروی قورتاردی قضا سنگینن *** ایگیت آزاده لرین آلدی جفا چنگینن

ائیدیلر دشمنیوی خوارو پشیمان وطنیم

بیلمرم ارمنی جنگینده سنه گلدی نه لر *** چوخ باشیندان آشیب البته سنین حادثه لر

ایگیتین معرکه ده اوستونه چوخ فتنه گَلَر *** ظالمین باشینا دوران ولی آخر کول اَلَر

بیله دیر خاصیت گردش دوران وطنیم

قاصد عشقه دنن مولوییه ایله خبر *** شمسدن واردی نشان یوردوموزا قیلسا نظر

خوی دادی برج و مناری هله ده واردی اثر *** قورولوب مجلس احباب گل ای مرغ سحر

اوخوسون نغمة دل باغدا هَزاران وطنیم

شیخ عارف قوناق اولسا یولونا مشک اَزَه رمْ *** او گلن یولارا من لاله و ریحان دوزه رَمْ

آچارام داش قاپونی شوقیله آذین بَزَه رَمْ *** نه قَدَرْ ناز ایله سه صبریده قالّام دُوزه رم

جمعیده خوشدور اولا مظهر عرفان وطنیم

بسله یب سن سینه ده گوهر یکدانه لری *** مُلاعلی، شیخ نوائی کیمی فرزانه لری

بحر عشق ایچره بَجَردَن دُر و دُردانه لری *** شمع عرفانه یانان عاشق و دیوانه لری

محفل عشقه اولان شمع شبستان وطنیم

اتگین بارلی دی کی فخر بو دوران یتیروب *** عالمه اولموش علم شانلی بیر انسان یتیروب

خویی تک مجتهدی آیت سبحان یتیروب *** تاباقون اُولمویا بُوش شعریمه عنوان یتروب

ایلیوب شهره جهانه سنی هرآن وطنیم

گون باتان سمتیده دور سید فتاح اوجاغی *** بیوک عارفدی اُو سیّد چوخونون وار سراغی

عرفا محفلینین شمعی دور اُو هم چراغی *** شیعه نین واسطه سی مشکلی اُولسا دایاغی

قاپوسی باب کرم حامی قرآن وطنیم

سنده دور آی آنا یوردوم گوزوم آی گولی بهار *** سنی توصیف ائیده رم من تاپارام شأن و وقار

سنی گزدیکجه اولار شاد ئورک ای سوگیلی یار*** جنت ین گوشه سی دیر داغ داشین آی شانلی دیار

خاک پاکندی سنین وادی حیران وطنیم

سیر ائیدر(مرغ حقین ) کونلی سنین داغ داشوی *** شاعر اوغلون چکری نظمه قارا گوز قاشوی

آیریب ظلم اَلی قارداشدان عجب قار داشیوی***گوزل ایرانما باشسان قُوروسونحق باشیوی

وطن عشقی ایلیوب طبعینی جوشان وطنیم

عباس حاجی زاده

بالا